MAKALA: SIMBA vs YANGA- MATOKEO YAMETENDA HAKI?

NA BARAKA MBOLEMBOLE

Mashabiki wa Yanga watalalamikia sana uchezaji wa safu yao ya ulinzi huku wale wa upande wa Simba wakibaki wasiamini kilichotokea katika pambano la mahasimu wa soka la Tanzania, ambalo lilimalizika kwa sare ya kufungana mabao 3-3, siku ya jumapili iliyopita.

Kocha wa Yanga, Ernie Brandts aliishia kuwatupia lawama wachezaji wake kutokana na kupoteza uongozi wa mabao 3-0 hadi nusu ya kwanza ya mchezo, huku akiwaambia kuwa hawana hadhi ya U-pro. Alishangaa kuona wachezaji wake wakiona wamemaliza mechi baada ya kuongoza mchezo na kusahau kuwa soka ni mchezo wa dakika 90, huku wakitambua wanacheza mchezo mkubwa. Kocha wa Simba, Abdallah 'King' Kibadeni yeye aliishia kusikitikia kiwango cha chini kilichooneshwa na timu yake, na wakati wa mapumziko aliwaambia wachezaji wake, "Najua kuna timu mbili ndani yetu, ipo timu ya uwanjani na timu ya nje ya uwanja. Ila hayo mabao yanatosha, nendeni kipindi cha pili mkacheze mpira". Unazitazanaje kauli hizi?

Kwa maoni yangu, Kwanza, nampongeza mwamuzi na wasaidizi wake. Israel Nkongo na wenzake waliingia uwanjani wakiwa chini ya ulinzi mkubwa wa polisi, haikuwa ' fair' kwa mtazamo wangu. Alijengewa mazingira mabaya ya kutokuwa na imani naye, huku upande wa kila timu ' ukimkataa' kabla ya mchezo. Alichezesha vizuri kwa muda wote, alikuwa na kasi, pumzi na uwezo wa kuyatazama matukio kwa usahihi, alishindwa kusimamia ipasavyo rafu ambayo Jonas Mkude alimchezea Frank Domayo, ilikuwa ni kadi nyekundu ya moja kwa moja, ilikuwa ni bahati kwa Simba.

Pili, nawasifu wachezaji kwa kucheza bila ubabe, ukitoa rafu mbaya aliyocheza Mkude, mchezo haukuwa na rafu za ubabe. Ndiyo zilikuwepo faulo wakati fulani lakini hazikuwa za kutisha. Tatu, nazilaumu timu zote kwa kukosa umakini katika muda mwingi wa mchezo. Nne, nalisifu benchi la ufundi la Simba kwa kuwarudishia imani wachezaji wao kuwa mechi ilikuwa haijaisha, na wachezaji wakafanya kweli. Yanga nawalaumu, kama ulikuwa ukifuatilia mechi kwa umakini baada ya wao kufunga bao la pili, walianza kukosa nidhamu ya mchezo, nyodo na mchezo wa madaha ukashika hatamu na kujiona kama tayari wamemaliza mechi. Magoli mawili ya vichwa waliyofungwa yanaonesha kuwa timu nzima haikuwa mchezoni. Walifungwa mabao ya wazi.
MRISHO NGASSA 

Baada ya kufunga bao la kuongoza kwa upande wa timu yake katika dakika ya 15 ya mchezo, Ngassa tayari alikuwa amemaliza mechi kwa upande wake. Alikuwa msumbufu, hatari na mchezaji aliyeivuruga ngome ya Simba kwa dakika 20 za kwanza za mchezo. Hata bao lake alilofunga lilitokana na kasi yake ambayo ilimsaidia kubadilishana nafasi kwa haraka na Hamis Kiiza wakati Didier Kavumbagu akiwa amemiliki mpira na walinzi na mmoja wa walinzi wawili wa kati wa Simba, Kiiza akakimbia pembeni na alipopigiwa pasi na 'Kavu' aliiunganisha kwa mtindo wa ' krosi kiki' ambayo iliyokuwa ni ya haraka na Ngassa akajikuta akifunga bao muhimu la kuongoza na kukomboa mali zake.

Yanga, wakatengeneza bao la pili baada ya kuwazidi nguvu Simba, ambao walikuwa wakianguka anguka mara kwa mara. Kiiza akafunga mara mbili. Kocha wa Simba, King alisikitishwa na uchezaji wa timu yake katika kipindi cha kwanza. Simba ilikuwa inacheza kama timu isiyo na kocha. Kuna wachezaji walionekana kucheza vizuri, ila kundi kubwa lilionesha kiwango cha kufadhaisha. Ramadhani Singano, hakuwa na makali yake, na alishiriki mara kwa mara kuisaidia Yanga. Mipira mingi ilikuwa ikifia katika miguu yake, alionekana mzito, na aliisadia Yanga kupata bao la tatu baada ya kukumbwa kikumbo na Athumani Idd ' Chuji' na kunyang'anywa mpira uliozaa bao la tatu la Yanga.

Abdulhalim Humud alifanya mambo kuwa magumu zaidi kwa upande wa timu yake. Mkude alikuwa na bahati alipopewa kadi ya manjano na si kadi nyekundu, na baada ya tukio lile alionekana kuimarika katika suala la nidhamu. Ila alipoteza kujiamini na kujikuta akipiga pasi mbovu za mara kwa mara na wakati fulani alionekana kushindwa kumiliki mpira hata kwa sekunde moja. Yanga walitawala kila idara katika kipindi chote cha kwanza, huku idara yao ya kiungo ikitawanya mipira katika wingi na kuongoza mchezo, Chuji alicheza vizuri katika nafasi ya kiungo-mlinzi, msaada wake mkubwa ilikuwa ni kumzima Mkude na kumghasi kila alipokuwa na mpira. Domayo alikuwa na macho makali katika mchezo huo alipiga pasi nyingi sahihi kitu ambacho kilifanya Yanga kukimbia huku wakiwategemea Ngassa na Kiiza katika mbio, 'Kavu' katika kumiliki mpira na Niyonzima kama, kiungo mchezesha timu akitokea pembeni.

Humud ambaye alikuwa na jukumu la kuhakisha, Domayo hapati muda mwingi wa kutulia na mipira na kupiga pasi ndefu huku akiwalinda walinzi wake wa kati, alionekana mzito, na asiye jiamini na kugeuzwa mchezaji wa ' ovyo'. Kiwango cha chini cha Humud kilipelekea timu nzima kushindwa kuwa na kasi, na kujikuta wakipotezwa uwanjani na mfumo wao wa 4-4-2 dhidi ya ule wa 4-3-3 walioutumia Yanga. Sijui kwa nini King aliishia kusema timu yake ina makundi mawili ndani yake, labda ni kutokana na kiwango cha chini cha mchezaji kama Humud .

BRANDTS

 Kocha huyu wa Yanga alifanya mabadiliko ya kipuuzi, pale alipomtoa Kiiza na kumuingiza Saimon Msuva. "Mimi nashindwa kuelewa kiukweli kile kilichotokea. 3-0 hadi 3-3!. Kocha aliniambia nikakabe tu" anasema Msuva wakati nilipozungumza naye leo hii. Sikatai kuingia kwa Msuva, ila kocha Brandts alitakiwa kumtoa mmoja wa wachezaji wake wa nafasi ya kiungo, Niyonzima au Domayo kama aliona kuna ulazima wa kufanya mabadiliko. Alipigwa bao na King ambaye aliamua kucheza kamari kwa kuwaingiza ' yosso', Said Ndemla na William Lucian na kuirudisha timu yake katika mfumo wa 4-3-3 kutoka ule wa 4-4-2.

"Ni matokeo ya kawaida tu katika mchezo wa soka. Wakati nipo katika benchi niligundua kuwa Niyonzima ndiye alikuwa tatizo kubwa kwetu. Alikuwa akimuumiza kichwa kila mmoja, nilimfikiria sana wakati nipo katika benchi.. Wakati naingia uwanjani nilikuwa nawaza ni mbinu gani nifanye ili kuisadia timu yangu kukomboa zile goli tatu. Alichoniambia King ni kwamba nikafanye vitu muhimu ambavyo vitaisadia timu, nikamsikiliza na matokeo yakabadilika kama ulivyoona." William Lucian anasema.

 Brandts anasema wachezaji wake ni wazembe ila naye alishindwa kwenda na muda na kusoma mchezo. Alipigwa bao na King. Kiiza alikuwa msumbufu na nilifikiri alikuwa karibu kufunga 'hat-trick', ajabu akatolewa na kuwafanya walinzi wa Simba kusogea mbele zaidi.

ALLY MUSTAPHA

 Mimi binafsi nimekuwa nikisikitishwa na kiwango cha chini cha kipa huyu msimu huu. Katika magoli 12 aliyofungwa hadi sasa, saba hadi nane yametokana na mipira ya kona, krosi au faulo. Mipira hii imekuwa tatizo kubwa kwake japo aliweza kuendana nayo msimu uliopita. Nimekuwa nikijiuliza mbona anashuka kwa kasi sana badala ya kuendelea kupanda? tatizo ni nini? Amelewa sifa baada ya msimu wa mafanikio au kiwango cha mafunzo kimepungua. Magoli mawili ya vichwa aliyofungwa siwezi kumlaumu. Nitawalaumu wachezaji na walinzi ambao waliruhusu Joseph Owino na Gilbert Kazze kuruka wakiwa huru na kupiga mpira. Ni uzembe wa mabeki, ila hata yeye hawezi kukwepa lawama kuwa kiwango chake alichomaliza nacho msimu uliopita kinaporomoka kwa kasi. Alichangia sare ya timu yake, alitakiwa acheze na maeneo huku akiwapanga wachezaji wake kuhakikisha wachezaji wa Simba hawapewi uhuru wa kuruka peke yao

"Asante kaka, ila nimeshuka kiwango, sijui kufundisha, njoo unisaidie" alinijibu kocha wa makipa wa Yanga , Razaq Siwa nilipohoji kiwango cha kipa wake huyo.

JULIO AACHE MAZOEA 

Kocha wa Simba, King alikuwa na mambo mengi katika kichwa chake hasa wakati timu yake ikiwa nyuma kwa mabao 3-1, kuna wakati alionekana akimsihi kocha wake msadizi asiwasemeshe sana wachezaji na kuwapigia kelele za mara kwa mara. Ni kweli wakati mwingine kelele za makocha huja wakati mbaya na mchezaji zinaweza kumtoa mchezoni zaidi. Najua, Julio alifanya vile kama sehemu ya kuwahamasisha na kuwakumbusha majukumu yao, ila wakati mwingine kelele za makocha hazifai na huwapoteza zaidi wachezaji

DHAIRA NA UREFU WAKE

 Mashabiki wa Simba waliondoka uwanjani baada ya nusu ya kwanza ya mchezo huku wengi wakiwakataa makocha wao, ila kipa Abel Dhaira aliionesha kuwakatisha tamaa kila mpira ulipokuwa ukienda katika lango lao. Aliishia kutema ' ovyo ovyo'. Nakumbuka niliandika kuwa mshindi wa mechi anaweza kuamuliwa na kipa atakayecheza vizuri zaidi katika mchezo huo, ila wote wakawa ' dhaifu' na tumepata mechi mechi mbovu iliyonogeshwa na udhaifu wa makipa MASHABIKI 11, wazimia ilikuwa ni balaaa