LIGI KUU VISIWANI ZANZIBAR, MAFUNZO, KMKM ZAENDELEZA UBABE!

Na Baraka Mpenja

Ligi kuu soka visiwani Zanzibar inazidi kuchanja mbuga baada ya leo hii michezo miwili ya vuta ni kuvuta kushuhudiwa katika viwanja viwili kisiwani Unguja na Pemba.

Akizungumza muda mfupi baada ya kumalizika kwa michezo hiyo , katibu mkuu wa chama cha kandanda visiwani humo, ZFA, Masud Ettei, amesema kisiwani Unguja klabu ya Mafunzo imeshuka dimbani na kuitungua bao 1-0 timu ya Zimamoto.

Kisiwania pemba vinara wa ligi hiyo wenye ndoto ya kutwaa taji msimu huu na kuibeba bendera ya Zanzibar ligi ya mabingwa barani afrika mwakani, klabu ya KMKM , imeshusha daluga zake na kushinda mabao 3-2 dhidi ya timu bora ya Jamhuri ya Pemba.

“Mechi ya Unguja ilikuwa ngumu sana kwa timu zote na ndio maana ushindi wa mbinde umepatikana, lakini kwa upande wa pemba, washambiliaji hatari wa KMKM wameonesha jeuri kubwa sana baada ya kufunga matatu, lakini Jamhuri wameonesha upinzani mkubwa sana”.  Alisema Ettei.

Katibu huyo aliongeza kuwa kwa sasa ligi ya visiwani humo ambayo KMKM wapo kileleni kwa kufikisha pointi 50 kufuatia matokeo ya leo, ipo hatua za mwisho kwani kuna timu zimebakisha mechi tano na nyingine mechi nne.

Ettei alisema timu za Mafunzo, Jamhuri pamoja na Chuoni zinapambana kufa na kupona ili kupata nafasi za juu na kuwakilisha taifa michuano ya kimataifa.

Baada ya mechi za leo ligi hiyo itaendelea kesho kwa mechi moja kupigwa kisiwani pemba, Bandari ya unguja itakuwa na kibarua kizito dhidi ya Duma ya kisiwani Pemba.

Akizungumzia ushindani wa ligi hiyo, Ettei alisema hali ni ngumu sana kwa timu zinazotaka kujinusru na mkasi wa kushuka daraja msimu huu.

 “Ushindani wa timu ni mkubwa sana, lakini hali ni hatari zaidi kwa timu za Malinzi, wakongwe Zanzibar, Mundu , Super Falcon na Duma ambazo zinachuana kukwepa mkasi wa kuporomoka daraja”. Alisema Ettei.

Zanzibar ni moja kati ya wanachama wa shirikisho la soka barani Afrika CAF na timu zake huwa zinacheza ligi zake yaani kombe la shirikisho na ligi ya mabingwa barani Afrika.