KOCHA WA AZAM: HIKI NDIO KITU KILICHOTUANGUSHA DHIDI YA SIMBA JANA

KOCHA wa Azam FC, Stewart Hall amekiri kuwa mfumo mpya wa uchezaji alitumia kwa mara ya kwanza dhidi ya Simba uliigharimu timu hiyo ingawa amemtaja winga Khamis Mcha kuwa ndiye shujaa wake.
Katika mchezo huo wa ligi uliochezwa kwenye Uwanja wa Taifa jijini Dar es Salaam jana Jumapili na kumalizika kwa timu zote mbili kufungana mabao 2-2.
Mwingereza huyo alibadilisha mfumo wa uchezaji kwa timu yake na kutumia mfumo wa 3:5:2 badala ya 4:3:3 ambao amekuwa akiutumia kwa kipindi kirefu.
Stewart aliwatumia mabeki watano ambao ni Mkenya Jockins Atudo, David Mwantika, Luckson Kakolaki na pembeni wakicheza Wazir Salum na Himid Mao waliotumika zaidi kama mawinga.
Mfumo huo ulitoa mwanya kwa vijana wa Simba ambao walikuwa wakicheza fomesheni ya 3:5:2 kupachika mabao mawili ya haraka ikiwa ndani ya dakika 18 za kipindi cha kwanza.
Kocha huyo alifanya mabadiliko kwa kumtoa beki wa kati, Luckson Kakolaki dakika 20 ya mchezo badala ya Khamis Mcha 'Vialli' ambaye kuingia kwake Azam ilibadili mfumo na kucheza 4:3:3
Mcha ilitumia dakika nne tangu alipoingia uwanjani na kuipa Azam penalti iliyofungwa na Kipre Tchetche, baada ya kuangushwa na Miraji Adam akienda kufunga.
Pia, alipiga faulo ambayo iliunganishwa na Mkenya Humphrey Mieno kufunga bao la pili kwa Azam FC.
"Kuingia kwa Mcha kulileta mafanikio kwetu. Nafikiri anastahili kuwa mchezaji bora wa mchezo." alisema Stewart.
Aliongeza; "Ni mara ya kwanza kutumia mfumo wa 3:5:2. Nadhani mara nyingi tunatumia 4:3:3, wachezaji wangu walishindwa kuushika kwa haraka na kulazimika kubadilika."
"Lengo letu kutumia mfumo huo ni kuhakikisha tunawabana vizuri katikati ya uwanja na kufanya mashambulizi mengi. Lakini nafikiri hilo halikuwezekana." alisema kocha huyo aliyetolewa kwenye benchi na mwamuzi wa mchezo huo, Oden Mbaga.