BONIFACE MKWASA NAIHOFIA POLISI MOROGORO - WAMEJIPANGA

  

Na Baraka Mpenja

Wapigwa kwata  wa jeshi la kujenga taifa kutoka mkoani Pwani, Ruvu shooting, wameihofia klabu ya Polisi Morogoro ambayo watakumbana nayo kesho kutwa  katika mchezo wa ligi kuu soka Tanzania bara kufuatia kasi kubwa ya timu hiyo ngwe hii ya lala salama.

Kocha mkuu wa klabu hiyo, Charles Boniface Mkwasa “Master” amesema wapinzani wao wameonekana kujipanga sana huku wakichagizwa na kampeni iliyoanzishwa na viongozi wa mkoa wa Morogoro kuinusuru timu hiyo kushuka daraja msimu huu.

“Maandalizi yanakwenda vizuri japokuwa kipindi hiki ni kigumu sana kwani kila timu inahitaji ushindi, Polisi ni timu iliyojikusanyia pointi nyingi mzunguko wa pili, lakini hatukubali kupoteza mechi ya tatu mfululizo”. Alisema Mkwasa.

Kocha huyo aliyewahi kuiongoza timu ya taifa ya wanawake ya Tanzania, Twiga Stars kwa mafanikio,aliongeza kuwa licha ya polisi kuwa nyumbani siku hiyo, wao wanajipanga kuwashushia bunduki zote ili kung`oka na mzigo wote wa pointi tatu muhimu.

Mkwasa alisema vijana wake wapo barabara na wanaendelea kupiga jalamba la nguvu ili kupambana na maafande wenzao ambao kwa sasa wanaongozwa na kocha mkuu Rishard Adolf.

“Hata wawe wagumu vipi hatuwezi kuwakimbia, lazima tule nao sahani moja, namalizia program yangu ya mazoezi ili kuwajenga vijana wangu kisaikolojia kwaniwameonekana kuwa na hofu kufuatia kufungwa mechi mbili mfululizo, Tulifungwa na Yanga D ar es Salaam baada ya hapo tukapoteza nyumbani dhidi ya Azam fc”. Aliongeza Mkwasa.

Pia kocha huyo mzawa wa Tanzania aliwataka mashabiki wa klabu yake kuendelea kuwaunga mkono wakati huu wa dakika za lala salama.

Wakati Mkwasa akiihofia Polisi Morogoro, kwa upande wao wamesema wanapanga mashine za mauaji ili kupambana na Shooting ambao ni kama simba aliyejeruhiwa baada ya kuboronga mechi mbili zilizopita.

Afisa habari wa klabu hiyo, Clemence Banzo amesema kwa sasa wanaendelea na mazoezi uwanja wa jamhuri na wachezaji wote wapo katika morali kubwa ya kutafuta matokeo ya ushindi siku hiyo.

“Tukishinda mechi ya jumatano kuna timu tatu tutazishusha katika msimamo wa ligi, mchezo huu ni kama fainali ingawa utakuwa na changamotoa sana kutokana na matokeo ambayo wapinzani wetu wameyapata huko nyuma”. Alisema Banzo.

Akizungumzia hali ya mashabiki mkoani Morogoro, Banzo alisema wanafurahishwa na kitendo cha wana Morogoro wengi kuwaunga mkono kila mechi, na kama wataendelea hivyo lazima timu itafanikiwa kubakia ligi kuu msimu huu.