Je Barcelona inamtegemea sana Lionel Messi?na je Guardiola ndiye anastahili hizi tuzo za Messi ? (PART 1)

Mwaka wa kalenda sio sawa na msimu wa soka , pamoja na hilo hakuna pingamizi juu ya uwezo wa Lionel Messi ambaye jana amepewa tuzo ya mchezaji bora wa dunia kwa mara yake ya nne mfululizo moja ya sababu za kumpa tuzo hiyo ikiwa mabao 91 aliyofunga katika miezi 12 ya mwaka uliopita .

 Bila ubishi wowote tunashuhudia kitu maalum katika mchezo wa soka nacho ni Lionel Messi . Hata hivyo wakati tuzo , mabao na sifa zikiendelea kumwagika kwa Messi , lazima tujiulize kitu kimoja haya yote yanasababisha madhara ya aina moja au nyingine kwa timu yake ? Makala hii itatazama mwenendo wa kutia hofu kwa mashabiki wa Barca mwenendo unaoonyesha jinsi Barcelona inavyokuwa tegemezi sana kwa Messi tofauti na Messi kuwa na msaada mkubwa kwa timu yake. Messi ana miaka 25 na ametwaa mataji yote kwa upande wa klabu katika kipindi kifupi cha maisha yake kama mchezaji wa Barcelona .

Uwezo wake umebadilisha mchezo wa soka ,movement zake uwanjani,maamuzi,kiwango cha mambo anayofanya akiwa na mpira mguuni kwake na uwezo wake mkubwa wa kumaliza akiwa kwenye eneo la hatari kwa ujumla vyote hivi vimefanya makocha na wachezaji wengi kujaribu kubadilisha uchezaji wa timu zao kuwa kama wa Messi.

Kipaji na uwezo wake vimeipa Barcelona mtindo na mfumo mzima wa soka linaloonekana Camp Nou. Messi ana uwezo wa kuamua matokeo ya michezo kwa uwezo wake mwenyewe pasipo kutumia nguvu nyingi tofauti na wachezaji wengi. Kama tuzo ya Ballon D'or ni utambulisho wa mchezaji bora kwa uwezo binafsi basi Messi anastahili kupewa tuzo hii kwa mara nyingine. Hata hivyo haya yote yanakuja kwa gharama ya mafanikio ya timu ya Barcelona

Mwaka mtupu kwa Barcelona.

Swali la kujiuliza ni moja , je huu umekuwa mwaka wa mafanikio kwa Messi . Hakuna ubishi katika hilo , Tuzo ya Ballon D'or inadhihirisha kuwa ulikuwa mwaka wake , hata hivyo pamoja na mwaka huu kuwa wake hali ilikuwaje kwa Barcelona kama timu? Jibu ni moja haukuwa mwaka mzuri kwa Barca kama timu tangu Pep Guardiola alipokuwa kocha wa timu hiyo kwa mara ya kwanza mwaka 2008.

Hivyo basi kama Messi ni bora kiasi hicho , kama anaweza kufunga mabao 91 kwa klabu na timu ya taifa kwanini haukuwa mwaka wa mafanikio kwa Barcelona ? Sio kila sababu ya mwaka mtupu wa Barcelona inamuelekea Lionel Messi, Tukumbuke kuwa Barcelona ilitambulisha mtindo na mfumo mpya na Kocha Pep Guardiola ambaye huenda alichangia kwa kuwatumia wachezaji vijana kina Isaac Cuenca na Christian Tello kuliko kiasi, labda sababu ilikuwa majeraha kwa watu kama David Villa,Puyol na Iniesta ambao waliumia kwa vipindi virefu na tofauti.

Sababu nyingine yaweza kuwa kushuka kwa viwango vya wachezaji kama Gerald Pique na Pedro pamoja na kusajiliwa kwa Cesc Fabregas ambaye pamoja na kufundishwa soka la Barcelona alirejea Nou Camp akiwa mchezaji tofauti na yule aliyeondoka akiwa na miaka 16 huku akiwa na falsafa tofauti kidogo ya Kiingereza zaidi kwenye soka lake. Alexis Sanchez pia hakuwa yule aliyetarajiwa, haya yote yalisababisha Barcelona kumtegemea sana Lionel Messi. Kwa kifupi haukuwa msimu mzuri kwa Pep Guardiola . Baada ya kuwa na msimu mzuri kwa miaka ya 2010-2011, Guardiola aliona haja ya kubadilisha mtindo wa kikosi chake.

Maamuzi mabaya na majeraha kwa wachezaji wenzie yalisababisha Messi kutegemewa kuliko kawaida kuiokoa Barcelona. Guardiola alilazimika kupoteza falsafa yake ya kujenga timu inayochangiwa na walau kila mchezaji na matokeo yake alimpa nguvu nyingi Messi kuliko wachezaji wengine. Mwanzoni mwa msimu wa mwaka 2011/2012 mpango wa Barcelona ulikuwa kutwaa taji la dunia kwa vilabu na kutetea ubingwa wa Ulaya . Nusu fainali ya Ligi ya mabingwa dhidi ya Chelsea ndio ilionyesha udhaifu wa Barcelona wa kumtegemea sana Messi na jinsi timu ilivyokosa Balance.

 Kwa kifupi Barcelona ilikuwa na kundi la viungo ambao kazi yao ilikuwa kumpa Messi mipira kwenye maeneo ya hatari. Mawinga Villa na Pedro ambao misimu ya awali walikuwa muhimu sana hawakuwepo. Messi alikosa sumu yake na alikuwa mwepesi kucheza dhidi yake kwa kuwa alilazimika kushuka chini kutafuta mipira kuliko kawaida, na beki ya Chelsea haikuwa na hofu kwa kuwa kwa kuwa Penetration ya Barcelona haikuwepo na hata pale ilipokuwepo haikumkuta Messi akiwa eneo la hatari hivyo Chelsea hawakuwa na sababu ya kuwa na hofu. Safu ya ushambuliaji ya Barca ilikuwa inatabirika na ilikuwa nyepesi kukabika na ndio maana Barcelona walihangaika kuivunja defence ngumu ya Chelsea ambayo ilitambua mapungufu haya ya Barca na kuyafanyia kazi kikamilifu, hata presha kubwa kisaikolojia kwa Messi katika mechi hizi mbili ilikuwa dhahiri.

ITAENDELEA.......