KUMBUKUMBU YA MIAKA 19 YA KIFO NA SHEREHE YA KUZALIWA UPYA KWA METHOD MOGELLA 'FUNDI'...... PART II

DADA YAKE AJIFUNGUA MTOTO BAADA YA KIFO CHA METHOD, AMPA JINA METHOD

Muda mfupi baada ya Method kufariki, dada yake aitwaye Angelina ambaye alikuwa na ujauzito alipatwa na uchungu na kujifungua salama mtoto wa kiume aliyekuwa na afya njema.

Kabla hajapewa taarifa za msiba, Angelina alifuatwa nyumbani kwake na kuelezwa kwamba mdogo wake amezidiwa hivyo anatakiwa aende kumjulia hali, hali hiyo ilimchanganya kidogo kwani alifahamu fika kwamba yeye si daktari na iweje afuatwe ili aende kumjulia hali ndugu yake. Alihisi kuna jambo linaloendelea hapo.

“Baada ya kufika maeneo ya karibu na nyumbani ndipo nilipoona dalili za kuwepo kwa kitu tofauti, Method alikuwa maarufu hivyo nikaanza kusikia kwamba amefariki hata kabla hatujafika nyumbani. Nilishtuka sana na kuangua kilio kikubwa sana.

“Kwa kuwa nilikuwa na ujauzito ambao muda wake wa kujifungua ulikuwa umepitiliza kwa wiki mbili, palepale nikaanza kuhisi uchungu na haraka nikawahishwa hospitali tayari kwa kuanza kufuatwa taratibu za kujifungua,” anasema Angelina.

Anasema alipofikishwa katika hospitali ya TMJ Mikocheni alipewa kitanda na madaktari wakaanza kumuhudumia lakini ilipofika saa 6 usiku alijifungua salama mtoto wa kiume. Anasema alimshukuru Mungu hakupata matatizo makubwa wakati wa kujifungua. 

Angelina alijifungua mtoto huyo baada ya kupata mshtuko wa kifo cha mdogo wake ambaye walikuwa wameshibana vya kutosha hivyo taarifa za kifo chake zilimshtua kiasi cha kupoteza fahamu.

Wakati ndugu wengine wakishughulika taratibu za mazishi ya Method, wengine walichukua jukumu la kumpeleka Angelina hospitali ambako alipofikishwa tu alijifungua mtoto wa kiume.

MTOTO APEWA JINA LA METHOD, AHAIDI KUFUATA NYAYO ZA MJOMBA

Kwa kweli ukimtazama mtoto aliyezaliwa na Angelina anafanana kwa vitu vingi na marehemu Method lakini uso na rangi ya weupe ndiyo inayothibitisha mfanano huu.

Saa chache baada ya kujifungua salama mtoto wa kiume, Angelina aliamua kumpa jina la Method mtoto huyo ambaye pia anatumia jina lingine la Aniceth.

Mama wa mtoto huyo anasema, amefanya hivyo kwa kumbukumbu ya marehemu mdogo wake ambaye walikuwa wameshibana sana. “Sikuwa na jinsi kwani niliamua tu kumpa mwanangu jina hilo kwani nilifahamu kwamba jina hilo litanifanya nimkumbuke ndugu yangu mara kwa mara,” anasema Angelina.

Dada huyo anasema hakupata wakati mgumu kuamua jina la mtoto wake kwani hata baba yake aliliridhia uamuzi huo kwa kumthamini marehemu shemeji yake.

KAULI YA METHOD MTOTO

Kwa sasa anasoma katika Chuo cha Usimamizi wa Fedha (IFM) akisomea cheti cha uhasibu na mambo ya bima, lakini Method Aniceth Theobald anasema anatamani sana kufikia mafanikio ya mjomba wake ambaye hakuwahi kumuona akicheza soka enzi zake.

“Nataka kucheza soka kama mjomba alivyokuwa akifanya, sifa zake nimezisikia tu kutoka kwa kaka zangu ambao waliwahi kumuona pengine akicheza soka. Najipanga kuleta picha mpya ya mjomba ambayo sasa haipo,” anasema Method.

Method anamudu kucheza namba nane, tisa na 10 uwanjani na hali ni tofauti kwani mjomba wake alikuwa akicheza kiungo namba sita wakati mwingi japokuwa alikuwa akipangwa katika nafasi nyingine pale inapolazimika.

“Mimi sina nguvu nyingi kuweza kumudu uwezo wa kuwazuia viungo wengi wenye nguvu ndiyo maana nikashauriwa kucheza namba ambazo hazihitaji kutumi nguvu nyingi zaidi ya akili ya soka,” anasema Method mdogo ambaye amefanana sura na marehemu Method.

Kwa sasa Method mdogo ameegemea zaidi katika kutafuta elimu hivyo anapata muda mdogo wa kucheza soka katika klabu za mtaani kwano japokuwa anasema anaweza kucheza katika timu nyingine mara tu atakapomaliza masomo yake.

“Mama mara kwa mara ananishauri kwamba kama ni mpira nitacheza hapo baadaye lakini sasa nikazane katika elimu ndiyo maana sina timu kubwa ninayochezea japokuwa kuna kipindi nilikuwa najiiba na kwenda kufanya mazoezi katika kikosi cha timu ay taifa ya vijana chini ya miaka 17,” anasema Method mdogo.

MARAFIKI ZAKE WANASEMAJE?

EDIBILY LUNYAMILA…

Edibily Lunyamila si jina geni katika soka la Tanzania, aliwahi kuvuma akiwa na kikosi cha Yanga katika miaka ya 1990, na Method alikuwa mshawishi mkubwa wa Lunyamila kusajiliwa na Yanga mwaka 1993 akitokea RTC Shinyanga.

Muda mfupi baada ya kutua Yanga, Lunyamila alipewa nyumba ya kuishi maeneo ya Magomeni lakini baada ya kukaa kwa muda mfupi marehemu Method alimshawishi wakawa wanakaa wote Mwenge katika eneo ambalo leo hii linajulikana kama Bamaga.

Lunyamila anasema marehemu hakuwa mtu anayependa makuu, bali alikuwa kijana mwenye msimamo muda wote wa maisha yake ndani na nje ya uwanja.

“Maisha yetu yalikuwa ya amani na kila mmoja wetu alimfurahia mwenzake, hakika tulikuwa tukiishi kama ndugu na mara nyingi Method alikuwa mfano mzuri kwangu kwani alikuwa mwalimu wa maisha kila mara, hakuwa mjivuni wala asiyependa maendeleo ya mwenzake,” anasema Lunyamila.

Lunyamila anakumbuka zaidi namna Method alivyokuwa mhamasishaji mkubwa katika fainali za Klabu Bingwa Afrika Mashariki na Kati wakati wanacheza huko Kampala mwaka 1993 kwenye Uwanja wa Nakivubo ambapo walifanikiwa kutwaa ubingwa baada ya kuifunga SC Villa mabao 2-1.

Winga huyo wa zamani wa Yanga anasema siku ambayo Method anafariki yeye alikuwa katika kambi ya Taifa Stars iliyokuwa ikijiandaa na mechi ya kufuzu Kombe la Mataifa ya Afrika dhidi ya Sudan.

Siku ambayo Method anaagwa ili akazikwe ndiyo siku ambayo Taifa Stars ilikuwa inacheza na Lunyamila ilibidi aombe kwa kocha na wachezaji wenzake kwamba asicheze mechi hiyo kutokana na kuwa katika majonzi ya msiba wa rafiki yake kipenzi.

“Hata hivyo wachezaji wenzangu pamoja na kocha walinifariji na kuniambia huku wakiniomba kwamba nicheze mechi hiyo muhimu ili tuweze kuwa nafasi nzuri ya kuhakikisha tunacheza Kombe la Afrika, nami nikakubaliana nao baada ya majadiliano ya muda mrefu,” anasema Lunyamila.

Kwa mujibu wa Lunyamila, Taifa Stars iliibuka na ushindi wa mabao 2-0 huku mfungaji wa mabao hayo akiwa Madaraka Selemani.

     Method Mdogo akiwa na mama yake Angelina....

STEVEN NEMES…

Huyu alikuwa kipa wa Yanga wakati timu hiyo inatwaa ubingwa wa Afrika Mashariki na Kati ngazi ya klabu, Steven Nemes anakumbuka jinsi Method alivyokuwa akiwahamasisha katika mechi za michuano hiyo hadi kuchukua ubingwa.

“Kila tulipokuwa tukiingia vyumba vya kubadilishia nguo huku tukiwa nyuma kwa mabao, Method alikuwa akitumia muda mwingi katika kuwahamasisha wachezaji wenzake juu ya kupambana na kuhakikisha wanarudisha bao au mabao na kushinda mchezo ikiwezekana,” anasema Nemes.

Nemes anasema binafsi ataendelea kumkumbuka Method kama rafiki yake wa karibu wa siku zote na mtu ambaye aliishi naye klabuni bila matatizo yoyote yale.

MUHIMU;

MAREHEMU METHOD MOGELLA HANA UNDUGU NA ZAMOYONI MOGELLA

Wengi wanaweza kudhani wawili hawa yaani, Method Mogella na Zamoyoni Mogella walikuwa ndugu wa damu kutokana na kufanana kwa majina yao, si kweli wawili hawa hawakuwa na undugu wowote zaidi ya kufanana kwa majina yao tu.

Dada yake Method, Angelina anasema; “Zamoyoni ni mtu ambaye ni kabila moja na sisi lakini hatuna undugu wowote ule na wote hawa wamekutana katika mambo ya mpira tu.”

KWA NINI METHOD MOGELLA NA SIYO METHOD MARTIN KUNAMBI?

Angelina anasema kwamba, jina halisi la mdogo wake ni Method Martin Kunambi lakini katika kabila lao la Waluguru mtu anaweza kuchagua jina lingine kutokana na hali halisi aliyonayo, hivyo Method alipewa jina la Mogella ambalo maana yake ni mweupe. Jina lingine linalofanana na hilo ni Mzeru.

Kwa upande wa wanawake weupe wanaozaliwa katika kabila hilo mara nyingi huitwa Ng’oga ikimaanisha asiyeogopa maji. 

NAAM, HAYO NDIYO MAMBO YA MAREHEMU METHOD MOGELLA.