AMLIMA: ALICHUKUA FEDHA ZA USAJILI SIMBA, YANGA, MAJIMAJI KISHA AKAINGIA MITINI NA KURUKA ADHABU YA FAT PART 11

Amlima alivyo sasa

Leo tunaendelea na simulizi ya mshambuliaji wa zamani wa Yanga na Taifa Stars, Idfonce Amlima ambaye aliweza kusaini na kuchukua fedha katika klabu tatu za Simba, Yanga na Majimaji, lakini akaruka adhabu ya kufungiwa kisha akaenda Mtwara kuichezea Bandari ya huko.

Unaweza ukashangaa lakini ndiyo ukweli wenyewe, Amlima wakati aking’ara na Bandari Mtwara hasa katika ufungaji wa mabao, mwaka 1992 klabu za Simba, Yanga na Majimaji ziliona uwezo wake na kumuwania kumsajili.

Kwa kuwa Amlima alikuwa anahitaji sana fedha, alifanya  makubaliano ya usajili na klabu zote hizo tatu, ambapo Simba na Yanga zote kwa pamoja zilikubali kisha zikamlipa Sh. 1,000,000 (Milioni Moja),ili zimsajili.

“Majimaji niliwaonea huruma kwa ni timu ya kutoka kwetu kusini (Songea), hivyo nikakubaliana nao wanipe Sh. 600,000 (Laki Sita) ili nijiunge nao, nikazichukua hizo fedha, halafu nikakaa kimya,” anasema Amlima.

Amlima anasema alichukua fedha hizo na kuanza kuzitumia lakini ndani ya kichwa chake alijua wazi kwamba hana mpango wa kuchezea hata timu moja katika msimu unaofuata.

“Nakumbuka nilipochukua fedha ya Simba, moja kwa moja nikaenda Kariakoo na kununua bati 60 ambazo hadi leo zinazuia nyumba yangu isiingize maji ndani na hizo nyingine za Yanga na Majimaji nikajihimarisha katika mambo mengine,” anasema Amlima.

Amlima anasema, msimu wa ligi ilipoanza, aliichezea Bandari Mtwara na kuziacha Simba, Yanga na Majimaji katika mataa na hata Chama cha Soka Tanzania (FAT), kilimuhidhinisha kucheza Bandari.

“Hata Simba, Yanga na Majimaji zilipolalamika kuhusu jambo hilo, FAT haikuwasikiliza na mimi nikachezea Bandari kama kawaida,” anasema Amlima.

  

JINSI ALIVYOCHUKUA FEDHA ZA SIMBA

Nyumba anayoishi Amlima

“Kusema kweli Simba ndiyo walikuwa watu wa kwanza kutaka kunisajili, kama unakumbuka huo ni wakati ambao Simba ilikuwa na wachezaji nyota kama George Masatu na Hussein Masha ambao nao walikuwa na mpango wa kujiunga na Yanga chini ya mfadhili wa Yanga, Abas Gulamali (sasa marehemu).

Nakumbuka habari kubwa wakati huo ilikuwa ni wachezaji hao kujiunga na Yanga huku aliyekuwa mfadhili wa Simba Azim Dewji naye akipambana kuhakikisha wachezaji hao hawaondoki katika kikosi chake. Kiongozi mmoja wa Simba alinifuata na kuniambia hazma yao ya kutaka kunisajili, name nikakubaliana naye kwa sababu nilikuwa na shida fedha,” anasema Amalima.

Amlima anasema alilazimika kuzichukua fedha hizo ili aweze kutatua matatizo yake na alipewa Sh. Milioni Moja na moja kwa moja alikwenda kununua bati alizoezekea nyumba yake kama inavyoonekana katika picha. Nasema muda mfupi tu baada ya kuchukua fedha hizo alikwenda moja kwa moja kununua bati ambazo kesho yake asubuhi alizipandisha katika basi hadi Mtwara mjini ilipo nyumba yake, huku akisubiri muda wa kuichezea Simba.

MASATU, MASHA WAMFANYA ACHUKUE FEDHA YANGA

Amlima anasema wakati akijipanga namna ya kuichezea Simba msimu unaofuata, Gulamali na watu wake walimfuata ili ajiunge na Yanga kitu kilichomshangaza katika kichwa chake japokuwa alikuwa na uwezo mkubwa uwanjani.

“Hakikuwa kitu chepesi kuamini kwamba Simba na Yanga zinanihitaji kuzichezea kwa wakati mmoja, hapo kengele ililia katika kichwa changu na kuona kuna kitu kinachoendelea nyuma ya pazia.

“Kweli baadaye nikabaini kwamba Yanga walitaka kunisajili ili ionekane nami nimesaini mara mbili kama ilivyokuwa kwa akina Masatu halafu katika makubaliano yao wabadilishane wachezaji ambapo labda mimi niende Simba na mmoja kati ya Masatu au Masha acheze Yanga, mapango ambao baadaye haikufanikiwa kwani Dewji na Gulamali walikubaliana wenyewe na wachezaji hao wakacheza Simba kasoro mimi,” anasema Amlima.

MAJIMAJI WALIJILETA WENYEWE

“Siku tukiwa katika kambi ya timu ya taifa, rafiki yangu mmoja aliyekuwa anacheza Majimaji aliniomba nimsindikize Kisutu (jijini Dar es Salaam) kwa mmoja kati ya mabosi wa Majimaji ili akachukue fedha, sasa tulipofika akanitambulisha kwa bosi wake.

“Yule bosi baada ya kusikia kwamba mimi ni Amlima akaanza kunisifia na kuniomba nijiunge nao, sasa hapo nikaona mbona mambo yanaenda kwa kasi mno na mimi bado naipenda Bandari ya Mtwara ambapo kulikuwa na ajira ya kudumu?

Sikulaza damu nikawauliza Majimaji wana kiasi gani cha fedha, nao wanakinijibu wana Sh. Laki Sita, sikulaza damu nikawaambia leteni maana niliona hawana uwezo wa kutoa fedha nyingi halafu pia ni ndugu zangu wa Kusini,” anasema Amlima.

KOSA LILILOFANYWA NA SIMBA, YANGA NA MAJIMAJI

“Timu zote hizo zilinipa fedha bila kunisainisha sehemu yoyote kwa kuamini kwamba wachezaji wote hawawezi kutambua mambo ya kisheria na wala hawana ujanja wa kukataa walichofanya bila maandishi, kama unavyoona leo hii.

“Sasa mimi wote hao tulikubaliana mdomoni tu na zile fomu au mkataba wa kukubaliana hatukuwa tumesaini ambao ungeweza kupelekwa Fat maana wakati ule kulikuwa na karatasi moja tu inayotambuliwa na Fat na ukisaini hiyo unakuwa hauna ujanja mwingine tena.

Kwa hiyo kwa kuwa nilifahamu hali hiyo halafu niliona kama usajili wangu ulikuwa wa kulipizana kisasi nikaona bora nirudi zangu Bandari kuendelea na kazi yangu kwani kule hakukuwa na mambo ya kusaini maana nilikuwa na ajira yangu,” anasema Amlima.

Kweli msimu uliofuata niliendelea kuitumikia Bandari na ingawa baadhi ya watu hawakunielewa na hata hizo klabu zenyewe hazikuweza kunisumbua sana japokuwa nilikuwa napata usumbufu wa aina yake,” anasema Amlima.

Amlima anasema klabu zote hazikuwa na kielelezo ambacho wangeweza kumtia hatiani kwa kuchukua fedha kwao ili aweze kupewa adhabu na Fat ambayo kwa wakati huo ilikuwa makini sana na mambo ya usajili wa wachezaji.

APITIA TANDALE KURUDI YANGA BURE

Baada ya kucheza sokakwa muda mrefu akiwa na Bandari na klabu mbalimbali za Oman, Amlima aliamishia makazi yake kwa muda jijini Dar es Salaam na makazi yake yalikuwa katika wilaya ya Kinondoni hasa Mwanyamala na Kinondoni.

“Wakati nipo Mwanyamala nikawa nafanya mazoezi katika uwanja wa shule ya msingi Mwananyamala B, ambapo klabu ya National ya Tandale iliniomba niwasaidie katika michuano ya Masafi pamoja na Kombe la Kinesi, huko nilicheza vizuri na Yanga wakanifuata huo ulikuwa mwaka 1994.

“Wakati nataka kusajiliwa Yanga, viongozi wakanikumbushia fedha zao nilizozichukua, name sikuwa na jinsi nikaamua kusaini fomu zao na kucheza soka kwa moyo wangu wote hadi nikapata mafanikio ndani ya timu hiyo japokuwa kuna mambo mengi nilikutana nayo ambayo mengine mazuri na mengine ya kusikitisha na yanayonifanya nikatishe mapema safari yangu ya soka,” anasema kwa masikitiko Amlima.

USIKOSE SEHEMU YA TATU YA MAKALA HII ILI UWEZE KUJUA AMLIMA ALIKUMBANA NA MAMBO GANI YANGA.