PRISONS WAJIPANGA KUISIMAMISHA AZAM FC NYUMBANI KWAO CHAMAZI

Na Baraka Mpenja

Maafande wa jeshi la magereza, Tanzania Prisons kutoka jijini Mbeya wamejigamba kuwatandika wana lamba lamba, klabu ya Azam fc katika mchezo wa ligi kuu Tanzania bara utaopigwa kesho kutwa (Machi 27) uwanja wa Azam Complex, Mbande nje kidogo ya jiji la Dar es Salaam.

Akizungumza leo hii, Katibu mkuu wa Prisons Sadick Jumbe amesema maandalizi yanakwenda vizuri na kocha mkuu Jumanne Chale anamalizia programu yake ya mazoezi kabla ya kuwavaa Azam nyumbani kwao.

Jumbe alisema kikosi chao kipo safi kwa asilimia zote kwani mpaka sasa hakuna mchezaji ambaye yupo hatarini kuukosa mchezo huo.

“Tunaenda kupambana na Azam fc ambao wametoka kushinda ugenini kombe la shirikisho dhidi ya Barrack Young Controller II ya Liberia, hii imewapa morali kubwa, lakini tutapambana kufa na kupona ili kupata ushindi wa ugenini”. Jumbe alisema.

Katibu huyo wa Prisons aliongeza kuwa, kikosi chake kimekaa maeneo ya Ukongo kwa zaidi ya wiki moja kikitokea mjini Arusha ambako kilifungwa 1-0 na wapiga kwata wenzao JKT Oljoro, mchezo wa ligi kuu.

Jumbe alisema wakiwa Ukonga wamecheza mechi za kujipima uwezo na African Lyon na kuwafunga 1-0, wakacheza na timu ya wizara ya ndani na kutoka nayo sare ya 2-2 na wakashuka dimbani dhidi Ukonga united.

“Tunakumbuka mchezo wa mzunguko wa kwanza tukiwa nyumbani Sokonne, tulilazimisha suluhu na Azam Fc, lakini safari hii tunahitaji kuwadhihirishia watanzania kuwa uwezo wa kuwafunga tunao”. Jumbe alitamba.

Akizungumzia suala la mchezaji wao wa zamani, David Mwantika, anayekipiga Azam kwa sasa  kuukosa mchezo huo kutokana na kuoneshwa kadi nyekundu mchezo uliopita dhidi ya Polisi Moro uliomalizika kwa sare ya 1-1, alisema ni nafasi nzuri kwao kwani nyota huyo anawafahamu sana washambuliaji wao.

Wakati huo huo Azam fc imeingia kambini rasmi leo hii baada ya nyota wake kurejea wakitokea kuitumikia timu ya taifa hapo jana dhidi ya simba ya Milima ya Atlas, timu ya taifa ya Morroco na kushinda 3-1.

Akizungumza leo Afisa habari wa Azam fc, Jafar Idd Maganga amesema wanamshukuru mungu kwani mpaka leo hii hawana mchezaji majeruhi baada ya mlinzi wao Hajji Nuhu kupona.

Maganga alisema wanatarajia mchezo huo kuwa wa vuta ni kuvute , lakini wanajiandaa vizuri kuhakikisha wanashinda na kujiweka vizuri katika mbio za kuwania ubingwa wa ligi kuu msimu wa 2012/2013.  

Msemaji huyo amesema  mechi mbili watakazo cheza dhid ya Prisons kesho kutwa na Ruvu shooting mwishoni mwa wiki zitawasaidia kujiweka sawa kabla ya mechi ya marudiano na Barrack Young Controller II ya Liberia katika Kombe la Shirikisho aprili 6 mwaka huu ndani ya uwanja wa taifa.

Azam fc wapo katika nafasi ya pili ya msimamo wa ligi wakiwa na pointi 37 nyuma ya vinara Yanga wenye pointi 48 huku Mnyama simba akiwa nafasi ya tatu na pointi zake 34.

Prisons wapo nafasi ya kumi wakiwa na pointi 20 kibindoni na wanapambana kuukwepa mkasi wa kurejea ligi daraja la kwanza kwa kuzipisha timu mpya tatu, Mbeya city ya Mbeya, Rhino Rangers ya Tabora pamoja na Ashant United zilizopanda kucheza ligi kuu msimu ujao.

Kabla ya mchezo huo wa keshokutwa , Azam fc walicheza na Barrack fc ya Liberia na kuishindi 2-1 , wakati Prisons wametokea Arusha walipofungwa 1-0 na maafande wenzao wa JKT Oljoro.