KIBADENI: NITAICHIMBIA KABURI SIMBA YA VIJANA KESHOKUTWA KAITABA

Kibaden akiwa baadhi ya wachezaji wa Simba

Na Baraka Mpenja

Wakata miwa wa Kaitaba, Kagera sugar, wametamba kuwaadabisha mabingwa watetezi wa ligi kuu Tanzania bara, wekundu wa Msimbazi Simba kwenye mchezo wa ligi kuu unaotarajiwa kupigwa keshokutwa katika dimba la kaitaba mjini Bukoba mkoani Kagera.

Akizungumza kwa njia ya simu kutoka Kaitaba, Kocha mkuu wa kagera sugar, Abdallah King Kibaden “Mputa” amesema maandalizi yanakwenda vizuri na mpaka sasa hakuna majeruhi yeyote.

Kibaden alisema alama tatu za mchezo huo zinahitajika sana, hivyo anawaeleza wachezaji wake kuwakabili Simba kwa tahadhari kubwa kutokana na hali halisi ya Simba kwa sasa.

“Nimefarijika sana kusikia Simba wamefanya maamuzi ya kuwaamini vijana wao wadogo kucheza mechi zilizosalia, binafsi nawafahamu sana vijana hawa, nimekaa nao na kuwafundisha pale Simba, ninachokifanya sasa ni kuandaa mbinu za kuwaburuza”. Kibaden alisema.

Mchezaji huyo wa zamani wa taifa stars , simba  na kocha wa klabu hiyo, aliongeza kuwa kwa sasa klabu yake inahitaji kujiweka nafasi nzuri katika msimamo wa ligi, hivyo kila mechi ndani ya uwanja wake wa nyumbani ni lazima jitihada zifanyike kupata alama tatu muhimu.

Kibaden alisisitiza kuwa mechi ya ngwe ya kwanza wakicheza uwanja wa taifa Dar es Salaam waliwabana wapinzani wao na kulazimisha sare ya 2-2, na sasa ni nafasi yao kujaribu bahati yao wakiwa mbele ya mashabiki wao mjini Bukoba.

“Nimewajenga wachezaji wangu kisaikolojia, kwa sasa nipo hatua za mwisho kupata kikosi cha vita mbele ya Simba, vijana wananielewa vizuri na wapo katika morali ya hali ya juu”. Kibaden alisema.

Akizungumzia hali ya hewa ya Kaitaba, Kibaden alisema kuna mvua za hapa na pale, lakini wachezaji wake wamezoea na hadhani kama itaathiri mchezo wa kesho kutwa.

Kwa upande wa wapinzani wa kagera sugar katika mchezo wa keshokutwa, wekundu wa Msimbazi Simba, leo wachezaji watano kati ya sita waliokuwa katika kikosi cha timu ya Taifa ya Tanzania taifa stars kilichoshuka dimbani jana na Morroco na kuwafunga 3-1 wameondoka kuungana na wenzao mjini Bukoba.

Afisa habari wa klabu ya simba Ezekiel Kamwaga, alisema wachezaji hao ni mlinda Mlango namba moja wa stars na nahodha, Juma Kaseja, mabeki Masoud Nassor “Cholo”, Shomary Kapombe na viungo ni Amri Athman Kiemba na Mrisho Khalfan Ngassa “Anko”.

Kamwaga alisema Mwinyi Kazimoto ameaachwa kwani hayupo kwenye mipango ya Kocha Mfaransa Patrick Liewig akisaidiwa na Jamhuri Kihwelu Julio na Mganda Moses Basena.

Wachezaji wa Simba SC ambao hawakuwamo  Katika kikosi chaTaifa Stars, wapo Bukoba tangu jana kwa ajili ya mchezo huo wa Ligi Kuu.

Aidha, Kamwaga alisema wachezaji wengine wawili waliokuwa katika kikosi cha timu ya taifa ya Uganda, The Cranes kilichopepetana na Liberia jana, kipa Abbel Dhaira na kiungo Mussa Mudde nao wataungana na timu wakitokea uganda moja kwa moja Bukoba.

 Wekundu wa Msimbazi wanaoonekana kuweka rehani ubingwa wao walioutwaa msimu uliopita kwani wanazidiwa pointi 14 na wapinzani wao wa jadi, ambao ni vinara, klabu ya Yanga inayoongoza kwa pointi 48.

Simba wanapigana kufa na kupona  kupata angalau nafasi ya pili kwa kuwapiku waoka mikate wa  Azam Fc ambao wapo katika nafasi hiyo kwa pointi zake 37. Simba ni ya tatu ikiwa na pointi 34.