ZAHORO; NILIFANYA VIZURI KATIKA MAJARIBIO YANGU CELTIC

 “Nafikiria sana kucheza nje ndiyo ninachokiwaza kutwa nzima” anasema kiungo mshambuliaji, Zahoro Pazi ambaye anacheza kwa mkopo katika timu ya soka ya JKT Ruvu ya Pwani akitokea timu ya Azam FC. Zahoro ambaye alikuwa nchini Afrika ya kusini akifanya majaribio ya kucheza soka la kulipwa katika timu ya Bloamfontein Celtic ya ligi kuu ya SA na kukosa nafasi baada ya timu hiyo kuhitaji mchezaji mmoja tu ili wafikishe idadi ya wachezaji watano wa kigeni wanaotakiwa kisheria nchini humo.

Katika majaribio hayo yaliyochukua siku kumi, Zahoro alifanya vizuri lakini Celtic ilikuwa ikihitaji mshambuliaji zaidi kuliko kiungo na hivyo kujikuta akipoteza nafasi ya kucheza soka nchini humo.

“ Namshukuru Mungu nimepigana mpaka mwisho na kiukweli sikufeli katika yale majaribio, ila  sheria za kule ni kila timu kuwa na wachezaji watano wa kigeni,  na kulikuwa na nafasi moja tu iliyokuwa imebaki, na jamaa ( Celtic) walikuwa wakihitaji mshambuliaji zaidi, na mimi nilikuwa winga, nafasi hiyo akapata raia wa Zimbabwe” anasema, Zahoro jioni ya leo wakati akizungumza na tovuti hii.

 “ Nimerudi Najiandaa upya nitafanya kazi katika timu yangu ya JKT Ruvu, na nafikiria kuwa huu utakuwa msimu wangu wa mwisho kucheza katika ligi kuu ya Tanzania na klabu za hapa nyumbani, Mungu akiitikia kilio changu kuna mahali nafikiria kwenda, lakini yote namuachia yeye kwa sababu ndiye anayepanga kila kitu hapa duniani” anamaliza kusema kiungo huyo wa zamani wa timu ya Taifa ya Tanzania na vilabu vya Mtibwa Sugar na African Lyon