JACK WARNER - MAKAMU WA RAISI WA FIFA ALIYENUKA RUSHWA

Wakati Jack Warner alipotoka kwenye mchezo wa soka mwaka 2011 aliacha wingu la hewa ya hasira nyuma yake  toka kwa watu waliodai kuwa hakupambanishwa na tuhuma za rushwa dhidi yake kwenye uchaguzi wa FIFA.

Haikuwa kama Warner alikuwa kiongozi mdogo kwenye uongozi mzima wa FIFA . Amekuwa makamu wa Rais wa FIFA , Rais wa CONCACAF  kwa miaka 11, Rais wa Chama cha soka kwenye visiwa vya Carribean na kiongozi wa soka la visiwa vya Trinidad and Tobago. Zaidi ya hayo Warner alikuwa waziri kwenye serikali ya Trinidad and Tobago.

Hata hivyo ripoti zilizoibuka wikiendi hii zinaonyesha kuwa bado watu wanazungumzia masuala mbalimbali yanayomhusu Warner . Kamati ya hadhi ya serikali imeundwa maalum kwa ajili ya kuchunguza tuhuma za masuala ya kibiashara ya Warner ambayo yana utata mwingi ndani yake hususani ushiriki wa taifa la Trinidad and Tobago kwenye kombe la dunia la mwaka 2006 huko nchini Ujerumani.

Nusu ya wachezaji wa timu ya taifa ya kipindi hicho wamekuwa wakihangaika mahakamani kusaka malipo ya bonus za ushiriki wao kwenye michuano hiyo huku lawama nyingi kwenye tuhuma hizo zikimwangukia Warner pamoja na chama cha soka cha Trinidad and Tobago kama Taasisi.

Ndani ya FIFA Warner amekuwa mshirika mkubwa wa rais wa FIFA Sepp Blatter . FIFA ilimruhusu Warner kufanya atakacho kwenye uongozi wa CONCACAF huku akisaidiwa kiuchumi huku kazi kubwa ambayo Blatter alimtaka aifanye ikiwa kumhakikishia kura 30 za ukanda wa CONCACAF kweye chaguzi mbalimbali za FIFA.

Hata hivyo haya yote yalianza kubadilika kwa ishara zilizoanza kuonekana mwaka 2011 ambapo Warner alionekana anaanza kumuunga mkono Mohamed Bin Hammam ambaye alijitokeza wazi na kutangaza kumpinga Blatter kwenye uchaguzi wa Urais wa FIFA .Warner aliandaa mkutano kwa ajili ya Bin Hammam huko Port Of Spain mji mkuu wa Trinidad and Tobago ambaye alikuwa akiutumia kufanya kampeni .

Ni mkutano huu ambapo wajumbe walipewa hongo za dola elfu 40 kwa kila mmoja huku wakiagizwa kuwa fedha hizo ni gharama za kufika kwenye mkutano huo. Kitendo hiki kiliifanya FIFA kufanya uchunguzi ambao matokeo yake yalikuwa kuwasimamisha Bin Hammam na Warner kwa kile kilichoitwa ukiukwaji wa maadili.

Warner aliondoka FIFA akiwa hana doa kwa kuwa aliwahi kuondoka kabla mambo hayajaharibika huku jamaa wake Bin Hammam akikutwa na hatia ambako alifungiwa maisha kujihusisha na soka. Hata hivyo adhabu hiyo  ya kifungo cha maisha iliondolewa na mahakama maalum kwa rufaa za michezo CAS ambako kwa sasa Bin Hamamm anakumbana na tuhuma za matumizi mabovu ya fedha za Chama cha soka cha Asia .