Ripoti ya mkanganyiko wa ligi ya soka jijini Tanga.

Jumla ya timu 14 ambazo zinatakiwa kushiriki ligi ya mkoa ambayo ilipangwa katika makundi matatu Timu zilizogawanywa katika makundi matatu na kundi lililokuwa na matatizo lilikuwa na timu ya Small Prison, African Sports , Segera FC , Air Shooting na Lushoto Shooting.

Timu ya Segera FC ndio ilionekana ni dhaifu katika kundi hilo ambapo mchezo wake wa kwanza ilifungwa mabao 2 kwa 1, mchezo wa pili walicheza dhidi ya Air Shooting wakafungwa mabao 4 kwa 1 na katika mchezo wa tatu dhidi ya Small Prisons ikafungwa mabao 5 kwa 1.

Mchezo uliokuja kuleta kasheshe ni baina ya African Sports dhidi ya Segera FC ambao ndio ulikuwa mchezo wa mwisho katika kundi hilo na hivyo African Sports waliingia uwanjani huku wakijua wanatakiwa kumfunga Segera FC mabao 5 kwa 0 ili waweze kuongoza kundi hilo na kwenda hatua inayofuata kwani kila kundi linatakiwa kutoa timu moja tu.

Kutokana na utafiti niliofanya na kuzungumza na baadhi ya wadau nikaelezwa kwamba African Sports waliwafuata Segera na kutaka kuwapa shilingi laki 3 ili waweze kupata idadi ya mabao 5 lakini Segera walikataa na kusema wao wanataka wakacheze na mwenye uwezo basi apate ushindi.

Baada ya Segera kukataa wahusika wakaambia kama mmekataa basi huu mzigo atapewa mwamuzi wa mchezo , lkn hapakuwa na uhakika kama huo mzigo kweli alipewa mwamuzi wa mchezo huo.

Sababu ya Segera FC kugomea mchezo dhidi ya African Sports wakati tayari wameshafungwa mabao 3 kwa 0 ni kutokana na maamuzi mabaya ya mwamuzi wa mchezo huo ambaye alikuwa Isihaka Shirikisho kwa kudai kwamba ndani ya dakika 30 mwamuzi alishatoa penati ambayo wanadai sio halali na mazingira ya mabao mengine mawili waliyofungwa yalitokana na mazingira ambayo wanaamini mwamuzi hakutumia vyema sheria 17 za mchezo wa soka.

Malalamiko ya wadau wa soka mkoani Tanga ni imekuaje Small Prisons imeingia katika sakata hilo kwani kosa la timu kugomea mchezo kanuni zipo wazi , kwani timu iliyogomea mchezo itapoteza ushindi kwa mujibu wa kanuni na timu pinzani kupewa ushindi wa mabao 3 na pointi 3 sambamba na adhabu nyingine kwa timu iliyogomea.Na pia chama hakiwezi kufuta matokeo ya michezo yote ya Segera kwani yenyewe ilifika uwanjani na kucheza kwa dakika kadhaa na hatimaye kugomea endapo kama isingefika uwanjani kabisa basi kuna uhalali wa kufutiwa matokeo yake yote.

 Mkanganyiko mwingine uliowavuruga wadau ni kigezo kipi walichokitumia chama cha soka mkoa wa Tanga kuamini kama Small Prison ilipanga matokeo na Segera FC ili kupata ushindi wa mabao 5 , kwani timu kama ilishafungwa mabao 4 katika mchezo uliopita kipi cha kushangaza kufungwa mabao 5 na Small Prison na kuepeleka kuamua kuzifuta katika ligi timu zote mbili African Sports na Small Prison.

 Chama kilifanya makosa au ndio wanaamini ilikuwa mbinu na kufanya wanachokitaka kwani , African Sports kufutwa kwenye ligi ilionewa kwani wao walistahili kupewa ushindi kwa mujibu wa kanuni za ligi za chama cha soka mkoani humo na Small Prison ilitakiwa ibaki na pointi zake walizopata.

 Hapo ndipo wadau wanaamini chama cha soka kilikuwa na agenda ya siri ya kutaka kumpata mshindi ambaye wao walishampanga, kwani hakukutakiwa kuwa na mlolongo wote huo na maswali mengi yanakuja ni kivipi unaweza kuamini kama hii timu ilipanga matokeo kwa kufungwa mabao 5 wakati mchezo uliopita ilishafungwa mabao 4.

Kwa kifupi michezo ya kundi hilo iliharibiwa na maamuzi ya chama cha soka cha mkoa wa Tanga kwa kushindwa kutoa maamuzi kwa mujibu wa kanuni na taratibu za mchezo wa soka na matokeo yake maamuzi yalitolewa kwa kufikiria ili kutengeneza sinema ambayo itakidhi mahitaji ya kupata mshindi aliyepangwa.

Matokeo ya michezo ya African Sports mchezo wa kwanza dhidi ya Prison 0 kwa 0 , mchezo dhidi ya Lushoto 0 kwa 0, mchezo dhidi ya Air Shooting, African Sports walishinda 1 kwa 0 na mchezo uliovunjika African Sports walikuwa wanaongoza 3 kwa 0.

Matokeo ya Small Prisons, mchezo wa kwanza dhidi ya African Sports walitoka suluhu, mchezo wa pili dhidi ya dhidi ya Lushoto Shooting Prison walishinda 1 kwa 0, mchezo dhidi ya Air shooting zilitoka suluhu na mchezo dhidi ya Segera wameshinda 5 kwa 1.

Mwisho tayari kundi hilo limeshamaliza michezo yake kwa kuamua kuwachezesha Small Prison na African Sports kama mchezo wa fainali na African Sports kupata ushindi wa mabao 2 kwa 1.

Ripoti hii imeandaliwa na Alex Luambano aliyekuepo mkoani Tanga.