BOBAN AMUUDHI JULIO, MBIONI KUTEMWA KILI STARS

Kitendo cha kiungo Haruna Moshi kuchelewa kuripoti kwenye kambi ya timu ya taifa ya Tanzania Bara ‘Kilimanjaro Stars’ kimemkera Kocha Msaidizi wa timu hiyo, Jamhuri Kihwelo ‘Julio’.

Moshi maarufu kama Boban hadi jana mchana alikuwa hajaripoti kwenye kambi ya timu hiyo iliyopo Dar es Salaam kujiandaa na michuano ya Chalenji itakayoanza Ijumaa wiki hii.

Akizungumza Dar es Salaam jana, Kihwelo alisema mchezaji huyo alimuaga anaenda Arusha kwa matatizo ya kifamilia, lakini mpaka sasa ameshindwa kujiunga na timu hiyo.

Alieleza kuwa kama asingejiunga na timu hiyo hadi jana jioni, basi angefunga mlango na hatampokea.

Kocha huyo alieleza kuwa Boban anapaswa kutambua kuwa kocha anaheshimu kazi yake hivyo hawezi tena kumvumilia ikiwa atashindwa kujiunga na wenzake kambini. “Nimempa nafasi Boban kwani ni mchezaji mzuri lakini asipojiunga na wenzake mpaka kufikia leo (jana) jioni, sitampokea tena,” alisema kocha huyo.

Julai mwaka huu, Boban aliitwa na Kocha Mkuu wa Taifa Stars, Jan Poulsen kwenye kikosi cha timu ya Taifa ya vijana chini ya umri wa miaka 23, lakini alikataa kujiunga. Boban hakupatikana jana kuzungumzia kuchelewa kwake kuripoti kambini.

Kwa mujibu wa Julio tayari mshambuliaji Gaudence Mwaikimba amejiunga na kambi ya timu hiyo na jana asubuhi alijumuika na wenzake wakati wa mazoezi ya timu Uwanja wa Karume.

Kiungo Nizar Khalfani aliyekuwa ameitwa kwenye timu hiyo ameondoka kurudi Canada kusaini mkataba mpya wa kuichezea klabu yake ya Vancouver Whitecaps.

Julio alisema wachezaji wote wameshajiunga na kambi ya timu hiyo na ari yao iko juu kuelekea mchezo wao dhidi ya Rwanda Jumamosi hii.

Kilimanjaro Stars iko Kundi A na timu za Rwanda, Nambia na Djibout.