ABDI KASSIM BABI NA HISTORIA YA KIPEKEE: MIAKA 13 BILA KUTEMWA STARS - MFUNGAJI WA BAO LA KWANZA UWANJA MPYA WA TAIFA

JINA la Abdi Kassim 'Babi' litakawia kupoteza kwenye soka la Tanzania.
Hiyo ni kwa ajili ya mambo mawili ya msingi.
Kufunga bao la kwanza Uwanja mpya wa Taifa jijini Dar es Salaam wakati ukifunguliwa rasmi 2007.
Pia, kuifungia klabu yake ya Azam FC bao la kwanza kwenye mashindano ya Kimataifa. Ni nani huyo Babi?

Familia ya soka

ABDI alizaliwa Oktoba 19, 1986 visiwani Zanzabar. Baba yake mzazi Kassim Abdul alikuwa mchezaji mpira timu ya Ujamaa na Taifa Zanzibar inayofahamika kwa jina la Zanzibar Heroes kwa sasa. Mama yake Sofia Talib alikuwa mfanyabiashara.

Mwanzo wa soka

Babi alianza kucheza soka tangu akiwa shule ya msingi Haile Sellasie Zanzibar.
"Nilianza kucheza soka tangu nikiwa na miaka mitano. Nilitamani sana kuwa mchezaji kama alivyokuwa baba yangu mzazi."
"Mwaka 1995 nilijiunga na timu ya Vikokotoni FC iliyokuwa ikishiriki Ligi Daraja la Pili, Zanzibar ."
Lakini nyota yake ilianza kung'ara mwaka 1999, baada ya kujiunga na timu ya Mlandege iliyokuwa ikishiriki Ligi Kuu, Zanzibar.
"Mwaka 2004 nilijiunga na Mtibwa Sugar ya Morogoro na kudumu nayo miaka mitatu tu, kabla ya kutua Yanga 2007."
"Ni baada ya Yanga walivutiwa na kiwango changu na kunisajili."


Jina lake la Utani

Kiungo huyo mwenye nguvu za kupiga mashuti makali na kulenga lango la timu pinzani.

Anasema jina la 'Babi' siyo jina lake halisi isipokuwa lilitokana na kaka yake anayemtaja kwa jina la Shabaan kushindwa kutamka Abdi.

"Badala ya kutamka Abdi alikuwa akiniita 'Babi'. Basi jina hilo lilishika kasi na kuenea kila mahali hadi leo hii."


Atinga jezi za Stars na kuichezea kwa miaka 13 mfululizo

Aliyekuwa kocha wa Taifa Stars wakati huo, Syllesaid Mziray ambaye kwa sasa ni marehemu ndiye aliyegundua kipaji chake na kumjumuisha kwa mara ya kwanza kwenye kikosi cha Stars.

"Ilikuwa ni mwaka 1999 nikiwa na timu ya Mlandege, Zanzibar."

Anaeleza kuwa tangu alipoitwa kwa hiyo ya kwanza hakuwahi kuachwa hata mara moja hadi Kim Poulsen anapochukua mikoba ya kocha Jan Poulsen aliyemaliza mkataba wake.

"Sikuwahi kuachwa hata mara moja tangu nilipoitwa na Mziray mwaka 1999."

Anasema Kim ambaye amekuja na falsafa ya soka la vijana ndiye aliyemtema, lakini anaamini bado ana uwezo na nguvu za kuitumikia timu hiyo.

Atua Yanga, aula Vietnam

Abdi Kassim alipokuwa Yanga

 "Mwaka 2007 nilijiunga na Yanga nikitokea Mtibwa Sugar. Lakini 2010 nilipata nafasi kujiunga na timu ya DT Long ya Vietnam."

Babi anaeleza kuwa dili hilo alichongewa na aliyekuwa mshambuliaji wa Simba na Taifa Stars Danny Mrwanda.

"Danny ndiye aliyeniunganisha na timu hiyo. Ilikuwa inahitaji kiungo. Aliweza kuwaonyesha CD na kunikubali."

Anasema viongozi wa timu hiyo walitua Dar es Salaam na kuongea na Yanga kwa ajili ya mipango ya uhamisho wake.

"Mambo yalienda vizuri na uongozi wa Yanga ulinipa baraka zote kujiunga na klabu hiyo."

"Nilipofika kule nilipokelewa vizuri. Ligi yao ina jumla ya timu 14." anasema kiungo huyo.

Abdi anasema alifanikiwa kucheza mechi 11 na kati ya michezo hizo alifunga mabao saba. Manne akifunga kwa mipira ya faulo na matatu kwa mashuti akiwa nje ya eneo la penalti.

Tofauti ya Vietnam, Tanzania
 
 "Kuna tofauti kubwa sana. Vietnam kila timu inamiliki uwanja wake binafsi. Ni kama ule wa Taifa wa zamani wa Uhuru na vina maduka pembeni."

"Kwa Tanzania nafikiri Azam ndiyo timu pekee yenye uwanja wake binafsi wa kisasa."

Waamuzi na Rushwa

Babi anasema Vietnam mwamuzi akigundulika amepokea rushwa kwa ajili ya kubeba timu fulani na kupindisha sheria 17 za soka anawekwa rumande.

"Timu niliyokuwa nikiichezea ilimfunga mwamuzi miezi sita. Alibainika kupokea rushwa kwenye mchezo wetu."

"Ni Chama chao cha soka kimejiweka utaratibu huo. Kwa suala la ubingwa. Timu yenye uwezo ndiyo itakayotwaa ubingwa."

"Ushindani ni mkali. Tofauti na hapa kwetu unaweza kujua matokeo ya mchezo kabla timu hazijacheza."

"Kwa upande wa mishahara wenzetu wako vizuri na makini sana. Mshahara kule ni kuanzia dola 5,000."

"Viongozi kule wapo makini sana na timu zao. Timu ikishinda kila mchezaji anapata bonus dola 1000. Ikitoka sare 100 na mkifungwa hampewi kitu. Kwa nini mtu usicheze mpira."

Ubaguzi wa Rangi Chanzo Cha kutodumu Vietnam

Abdi anasema alisaini mkataba wa miaka miwili kukipiga na DT Long ya Vietnam, lakini alidumu kwa miezi minane tu.

"Tukiwa katikati ya msimu. Uongozi ulileta kocha mpya ambaye ni raia wa Ujerumani."

Anasema kocha huyo alipotua kukinoa kikosi cha timu hiyo alikuwa akibagua wachezaji weusi.

"Mambo yalivyozidi kuwa magumu niliamua kufanya mawasiliano na uongozi wa Azam kujiunga na timu hiyo."

"Mambo yalienda vizuri. Nilipotua Tanzania 2011 nilisaini mkataba wa miaka miaka miwili kuichezea Azam."

Apata mtoto Brazil

Babi akiwa na kikosi cha Taifa Stars nchini Brazil mwaka 2007 kwa ajili ya kambi ya mwezi mmoja kujiwinda na pambano dhidi ya Senegal alipata mtoto wake wa kwanza na mke wake wa ndoa Aisha Yusuph.

"Kwa kawaida jambo kama hilo likikutokea hata wewe, huna budi kufurahi na kushukuru."

Anasema unapozaliwa nawe unatakiwa kuzaa isipokuwa kuzaa ni majaliwa.

"Ni wa kike. Nilimwita Zaliha jina la shangazi yake. Kwa sasa ana miaka sita." anasema Babi.

"Mzao wa pili nilibahatika kupata watoto mapacha. Ni kike na kiume. Niliwaita Zulfati na Abdul."

Bao la kwanza Taifa, Azam

Jina la Abdi Kassim 'Babi' litakawia sana kupotea kwenye medani ya soka la Tanzania.
Vitu vitakavyochelewesha jina hilo kupotea kwa uharaka ni viwili.
Mosi, kufunga bao la kwanza Uwanja wa kisasa wa Taifa jijini Dar es Salaam na Azam FC katika michuano ya kimataifa.
Babi ndiye mfungaji wa bao la kwanza Uwanja wa Taifa wakati ukizinduliwa rasmi kuanza kutumika Septemba Mosi, 2007.
Kiungo huyo alifunga bao hilo katika mechi ya kirafiki kimataifa kati ya Taifa Stars na Uganda 'The Cranes'. Stars ilishinda 1-0.
Babi alifunga bao hilo kipindi cha pili kwa shuti kali la mguu wa kushoto zipatazo mita 35.
"Nakumbuka pasi alinipa Haruna Moshi 'Boban'. Nilituliza mpira na kuusogeza kidogo na kupiga shuti kali ambalo lilimshinda kipa kudaka."
Babi anasema lilikuwa goli la kusini upande ambao mashabiki wa Yanga wanapoketi.
Babi amezidi kukoleza rekodi yake kwa kufunga tena bao la kwanza la Azam FC katika mashindano ya Kimataifa.
Bao hilo alifungwa dhidi ya Al Nasri ya Sudan Kusini Februari 16 Uwanja wa Taifa ukiwa ni mchezo wa kwanza wa Azam FC kushiriki mashindano ya kimataifa, Kombe la Shirikisho (CAF). Azam ilishinda mabao 3-1.
Babi alifunga bao hilo la kwanza kwa kichwa katika lango la kusini akiunganisha krosi ya Kipre Tchetche.

Tofauti yake na wengine

Babi amejiwekea programu yake binafsi ya mazoezi ukiacha ya mwalimu wa timu.
"Kila siku nimetenga saa moja na dakika 15 kwa ajili ya mazoezi yangu binafsi."
Anaeleza kuwa dakika 30 huzitumia kwa 'sprint' nyingine kuruka kamba na 15 mazoezi ya viungo.
"Mazoezi hayo nanijenga kuwa na stamina, kasi na wepesi uwanjani." anasema Babi."
Akielezea nguvu zake kupiga mashuti anasema ni kitu ambacho Mungu amempa hivyo hana budi kuzitunza.
"Najua nguvu ni kitu cha kuisha. Lakini ukizitunza vizuri nazo zitadumu. Nafikiri nalitambua sana hilo." anaeleza.

Kiungo anayemvutia

Babi anasema kwa Tanzania Bara hayupo isipokuwa kwa Zanzibar alikuwepo lakini kwa sasa amestaafu soka.
Anasema kiungo aliyekuwa akimkubali ni Ramadhan Hamsa Kidilu wa Mlandege na Mtibwa Sugar kabla ya kustaafu kwake soka.
"Viungo wengi wa sasa wametawaliwa na papara nyingine. Hawana msaada na timu zao."
Anaeleza kuwa Salum Abubakari 'Sure Boy' wa Azam FC kidogo ameanza kuvutiwa naye lakini si kama ilivyokuwa kwa Kidilu.
"Sure anajitahidi lakini nafikiri bado ana kazi kubwa yakufanya kumfikia Kidilu ambaye alikuwa na vitu vya ziada kuweza kuisaidia timu ikapata matokeo mazuri."

Historia
Abdi Kassim ni mtoto wa pili kuzaliwa katika familia ya watoto nane. Kati ya watoto hao wa kike ni wawili na wakiume sita

ABDI KASSIM 'BABI'
Kuzaliwa; Oktoba 19, 1986
Mahali; Zanzibar
Klabu alizochezea;
Vikokotoni FC;  1995/98
Mlandege FC;   1999/04
Mtibwa Sugar; 2004/07
Yanga SC;     2007/10
DT Long FC;   2010/11
Azam FC;      2013
Taifa;       Tanzania