BASENA: SIIHOFII YANGA WALA TIMU YEYOTE, KIKOSI CHANGU NI BORA.

KOCHA wa Wekundu wa Msimbazi Simba Mganda Moses Basena ametamba kuwa hawahofii hata kidogo mahasimu wao Yanga kwa kuwa anakiamini kikosi chake hakiwezi kumwangusha katika mechi itakayopigwa Oktoba 29 Uwanja wa Taifa jijini Dar es Salaam.

Akizungumza jana , Basena alisema, si Yanga tu, bali hahofii timu yoyote katika ligi, bali anakaza buti ili kuweza kutwaa ubingwa msimu huu 2011/2012.

“Yanga ni timu ya kawaida kama timu nyingine ambazo tumekutana nazo, hivyo siogopi, wao wajiandae kufungwa,” alisema Basena.

Basena alisema siri yake katika ushindi ambao wanaupata, ni mazoezi mazuri ambayo anawapata wachezaji wake katika ufukwe wa Bamba uliopo Kigamboni na kuwaweka pamoja, jambo linalomuongezea ufanisi.

Alisema katika mechi ijayo Jumamosi na Yanga, kwa upande wake amejipanga muda mrefu na hasubiri siku ya pambano.