JERRY TEGETE: NIMEPANIA KURUDISHA NAMBA YANGU NDANI YA KIKOSI CHA STARS

MSHAMBULIAJI wa Yanga, Jerry Tegete amesema amepania kujituma zaidi ili arudi kwenye kikosi cha Taifa Stars.
Akizungumza jijini Dar es Salaam Tegete amesema anafahamu kuwa Kim Poulsen ni kocha ambaye hapendi maneno mengi bali anajali uwezo, juhudi na uzalendo.
Tegete amekiri kuwa mambo yanamwendea vizuri kwenye mzunguko wa pili wa Ligi Kuu Tanzania Bara tangu timu hiyo ilipotoka Uturuki kwa kambi ya wiki mbili kujiwinda na Ligi Kuu Bara.
Tegete katika siku za karibuni alikuwa ameshuka kiwango kiasi cha kufanya asote benchi huku akiwaachia mastraika wenzake Didier Kavumbagu, Hamisi Kiiza na Said Bahanuzi wakitamba kikosi cha Yanga.
Hata hivyo, kwa sasa imekuwa kinyume chake kwani ndiye chaguo la kwanza la kocha Ernie Brandts huku Bahanuzi na Kiiza wakianzia benchi.
“Nina usongo na Stars lakini nawaachia walimu na benchi la ufundi waangalie maendeleo yangu,” alisema nyota huyo.
Tegete alijumuishwa kwenye kikosi cha Stars na kocha Mbrazili Marcio Maximo, ambaye akiwa anasoka katika shule ya Sekondari Makongo.
Stars kwa sasa ipo kambini kijiwinda na mechi ya kimataifa ya kirafiki dhidi ya timu ya taifa ya Cameroon Jumatano kwenye Uwanja wa Taifa jijini Dar es Salaam.
Mchezo huo upo kwenye kalenda ya Shirikisho la Soka la Kimataifa (Fifa)