USAJILI WA WACHEZAJI BONGO

Kipindi cha uhamisho wa wachezaji kwa msimu wa mwaka 2011/2012 kinamalizika
Julai 15 mwaka huu wakati mwisho wa usajili ni Julai 20 mwaka huu.

Kwa upande wa klabu za Ligi Kuu, usajili wao unaanzia kwa timu za pili (U20),
hivyo kwanza zinatakiwa kukabidhi usajili wa timu hizo na baadaye za timu zao za
kwanza (senior). Klabu zote za Ligi Kuu tayari zina passwords zao kwa ajili ya
kufanya usajili wa wachezaji wa kigeni.

Dirisha dogo la usajili litafunguliwa tena Novemba 1 hadi 30 mwaka huu.

Tunazikumbusha timu zote za Ligi Kuu kuwasilisha majina ya viwanja ambavyo
zitatumia kwa ajili ya ligi hiyo ambayo itaanza Agosti 20 mwaka huu.


Klabu ambazo zimewasilisha maombi ya viwanja ambavyo zitatumia ni Mtibwa Sugar
(Manungu), Azam (Chamazi), Ruvu Shooting Stars (Mlandizi), Coastal Union
(Mkwakwani), Toto Africans (CCM Kirumba), Oljoro JKT (Kumbukumbu ya Sheikh Amri
Abeid Kaluta), Polisi Tanzania (Jamhuri, Dodoma) na Kagera Sugar (Kaitaba).

Klabu ambazo bado hazijawasilisha viwanja vyao ni Yanga, Simba, Moro United,
Villa Squad, JKT Ruvu na African Lyon. Timu hizo zinatakiwa kutuma majina ya
viwanja vyao haraka, kwani kabla ya kuruhusiwa kutumika ni lazima vithibitishwe
na Kurugenzi ya Ufundi ya TFF.